Gosod sblintiau

Dyfeisiadau wedi'u gwneud o ddeunydd thermoblastig ac sy'n cael eu mowldio o gwmpas breichiau, coesau neu wddf eich plentyn i gadw'r rhan honno o'r corff yn yr ystum iawn yw sblintiau. Rhaid i sblintiau sy'n cael eu gwisgo yn y dydd amddiffyn cymalau poenus, a gadael i'r plentyn ddefnyddio'i haelodau mor normal â phosibl. Sblintiau gorffwys yw'r rhai sy'n cael eu gwisgo yn y nos ac maen nhw wedi'u cynllunio i ganiatáu i'r cymalau orffwys mewn ystum niwtral.

Fe ddylai sblintiau leddfu poen yn y cymalau, a dylai plant sy'n gwisgo sblintiau'n gyson weld eu bod yn gallu dal ati i chwarae neu weithio yn yr ysgol am gyfnodau meithach pan fyddan nhw'n eu gwisgo na phan na fyddan nhw. Fe all gwisgo sblintiau'n gyson helpu i rwystro anffurfio'r cymalau a thrwy wisgo sblintiau coesau yn y nos, fe all plant gerdded y peth cyntaf y bore pan fyddai stiffrwydd arferol bore cynnar yn golygu, fel arfer, na allai eu coesau plygedig gynnal pwysau.

Fel arfer fe gaiff sblintiau (dyfeisiadau orthotig) eu gwneud gan therapyddion galwedigaethol neu orthotegwyr proffesiynol, ac ambell dro gan ffisiotherapyddion. Mae rhai ffisiotherapyddion yn credu nad oes arnyn nhw angen hyfforddiant orthotig arbenigol i wneud sblintiau effeithiol i blant ag arthritis, a falle bydd ganddyn nhw'r hyder 'i roi cynnig arni'. I rieni mae'r agwedd hon o 'hyder uwchlaw medr' yn annerbyniol, am fod gwneud sblintiau ar gyfer plant yn golygu rheoli ofnau'r plentyn yn ofalus a'i chael i gydweithredu tra bydd y sblint yn cael ei wneud.

Fe all plant ag arthritis fod yn defnyddio gwahanol sblintiau am flynyddoedd lawer, ac fe all eu profiad cyntaf o sblintiau eu gwneud yn fwy neu'n llai parod i'w gwisgo. Mae'r plant hyn sydd mewn poen angen therapyddion medrus a gwybodus sydd eisoes wedi meistroli'r sgil technegol o wneud sblintiau. Dim ond o dan arolygaeth orthotegydd rhewmatolegol arbenigol sy'n gyfarwydd â phlant y dylai therapydd ddysgu orthoteg ar y grwp hwn o blant bregus. Ddylai gwneud sblintiau modern ddim peri unrhyw anghysur i blentyn, er y gall brofi'u hamynedd yn ystod y broses hir.

Byw gyda sblintiau a gofalu amdanyn nhw

• Peidiwch â gadael y sblintiau mewn man y gallan nhw doddi - felly nid ar wresogyddion, nid ar silffoedd mewn ceir poeth wedi'u parcio, nac ar draethau heulog nac mewn bath poeth!
• Golchwch nhw mewn dwr sebon cynnes a'u gadael i sychu yn y gegin.
• Fe all sblintiau ddechrau rhwbio rhannau bach o'r croen, e.e., ar un ochr o'r arddwrn am ei fod wedi chwyddo. I gywiro hyn, gweithiwch uwchben sinc y gegin, tywalltwch ychydig ddwr poeth yn ofalus dros y rhan fach o'r sblint ac ystwythwch ef â'ch bawd i'w wneud ychydig yn lletach. Gofalwch na fydd y dwr poeth yn effeithio ar unrhyw ran arall o'r sblint.
• Os bydd y sblint yn mynd yn rhy fychan, yn torri neu'n rhy anghysurus rhaid i chi siarad â'r person a'i gwnaeth a gofyn am gael ei gywiro.
• Ambell dro fe gewch gais i chi wneud yn siwr fod eich plentyn yn gwisgo'u sblint trwy'r nos. Mae hon yn dasg anodd. Os bydd y sblintiau wedi'u gwneud yn dda, fe fyddan nhw'n ffitio'r plentyn, a'r broblem yw trefnu awyrgylch amser gwely sy'n cynnwys gosod y sblintiau, ac yn gadael y plentyn wedi setlo ac yn barod i gysgu. Yn rhy aml gyda'r nos rydych chi a'ch plentyn wedi blino, yn flin, yn gynhyrfus ac yn casáu'r dadlau y mae'r sblintiau yn ei achosi. I osgoi hynny, ar ôl bath cynnes gyda'r nos, helpwch eich plentyn i'w sblintiau a gadewch iddi wneud rhywbeth cymharol dawel (fel gwylio'i hoff fideo, neu ddarllen stori), ac yna helpwch hi i'r gwely. Rhaid cadw at y drefn hon pwy bynnag sy'n gyfrifol am drefn amser gwely. Mae'n lleihau dadlau, ac yn caniatáu i chi a'ch plentyn dawelu ar ôl gosod y sblintiau. Mae'r drefn gyson hefyd yn rhoi patrwm diogel, tawel y mae hi'n ei ddisgwyl iddi ac un na fedr hi ddylanwadu arnoch chi i'w newid. Mae hefyd yn rhoi amser i setlo'n emosiynol cyn swatio yn y gwely.
• Os bydd eich plentyn yn gorfod gwisgo sblintiau yn y nos, fe allwch chi gyfaddawdu: yn lle gwisgo sblintiau ar ddwy fraich neu ddwy goes, helpwch eich plentyn i wisgo sblintiau ar un ochr un noson, ac ar yr ochr arall y noson wedyn. Mae hyn yn well na methu eu gwisgo o gwbl.